Deputeti Lefter Maliqi është mes atyre që kanë marrë rimbursim të shpenzimeve të karburantit për makinën edhe gjatë kohës kur i gjithë vendi ishte në karantinë dhe qarkullimi me makinë ishte ndaluar. Në prononcimin e tij për Dosja.al, Maliqi u shpreh se nuk kishte qënë dakord me vendimin për përgjysmimin e rrogës si shenjë solidariteti për situatën e krijuar nga pandemia e COVID-19, pasi me ato para mund të ndihmonte disa familje në nevojë në zonën e tij. Më tej, Maliqi ka treguar popullaritetin e tij në zonë, duke rrëfyer se shkon në çdo “qokë” si një shenjë mirënjohjeje për të gjithë ata që i kanë besuar votën.
“Unë kam lëvizur dhe 570 mijë lekë nga paga e deputetit mi ka mbajtur dietat i ka marrë gjithë Kuvendi të gjithë deputetët dhe janë ligjore, ne të opozitës edhe pagën s’kishte pse ta përgjysmonte pasi me lekët e rrogës ndihmova mbi 40 familje në zonë. Ata të maxhorancës le ta linin dhe rrogën të gjithë se kanë tendera, drejtora, pushtet, biznesmena që i ndihmojnë e favorizojnë. Unë me pagën time shkoj në zonë vizitoj e ndihmoj familje në nevojë, vetë dhe në çdo ngushëllim dhe hedh nga paga gjysmake që marr. Iki në çdo vaki se është mirënjohja ndaj tyre. Unë vetë dhe në spitale kur ka operime të rënda për njerëzit e zonës. Pse t’ua lë atyre kur ia çoj hallexhinjve të zonës? Pse keni besim që Rama me pagat që u mbajti deputetëve, i përdori për pandeminë? Mos na hapni barkun me hajdutin më të madh të shqiptarëve?,”-u shpreh Maliqi.
Në listën e publikuar, Lefter Maliqi rezulton se ka përfituar 40,000 lekë për karburant dhe 75,250 lekë për dietë, edhe pse të gjithë kanë qëndruar në shtëpi dhe nuk kanë udhëtuar për shkak të shtetrrethimit të krijuar për të ndaluar përhapjen e koronavirusit.
