13 gola dhe 6 asiste në 24 ndeshje, kjo është kartëvizita e Ernest Muçit, shifra që flasin qartë për ndikimin e tij në skuadër. Trabzonspor ka në dorë një “xhevahir” të vërtetë, një lojtar ku mund të investojnë pa frikë. Këtë periudhë drejtuesit e klubit turk janë bindur plotësisht për të blerë kartonin e sulmuesit kuqezi, madje nuk do të futen më në negociata për të përfituar pak ulje, të vetëdijshëm se Beshiktash, skuadër që ka në pronësi kartonin e tij, nuk pranon skonto.
Pasi paguan në verë 1 milionë euro për huazimin e tij, Trabzonspor ka të drejtë të paguajë me këste pjesën e mbetur të shumës prej 8,5 milionë euro. Në fillim drejtuesit e klubit hezituan, por me kalimin e kohës e kuptuan se çfarë lojtari kanë në dorë. Në Turqi, mediat shkruajnë se Trabzonspor do të aktivizojë të drejtën për të blerë kartonin, por në të njëjtën kohë kanë marrë në konsideratë edhe ofertat e shumta që kanë ardhur në drejtimin të tij.
Pavarësisht se nuk bëjnë publike emrat, mediat në Turqi zbulojnë se interesimi i klubeve angleze është konkret dhe në fund të këtij sezoni pritet të paraqiten në derën e Trabzonspor me një ofertë zyrtare. Në këtë rast, nuk përjashtohet opsioni që ekipi turk të shes Muçin për të përfituar një shifër të majme.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
