Barney Frank, ish-anëtar i Dhomës së Përfaqësuesve në SHBA dhe një nga politikanët më të njohur demokratë në Amerikë, ka ndërruar jetë në moshën 86-vjeçare.
Lajmi u konfirmua nga motra e tij për NBC Boston. Frank vuante nga insuficienca kongjestive e zemrës dhe prej kohësh kishte hyrë në kujdes paliativ në banesën e tij në Maine. Në një intervistë të fundit për Politico, ai ishte shprehur se po e përjetonte qetësisht gjendjen e tij shëndetësore.
“Në moshën 86-vjeçare, kam jetuar më gjatë sesa mendoja”, kishte deklaruar ai. “Në një moment zemra thjesht do të dorëzohet dhe tani po i afrohem asaj faze”.
Frank shërbeu si përfaqësues i Massachusetts në Kongres nga viti 1981 deri në vitin 2013 dhe konsiderohej një nga figurat më të rëndësishme të komunitetit LGBTQ+ në politikën amerikane. Ai doli publikisht si homoseksual në vitin 1987, në një periudhë kur tema konsiderohej ende tabu në politikë.
Gjatë karrierës së tij, Frank u bë i njohur edhe për rolin kyç në hartimin e ligjit financiar “Dodd-Frank Act” në vitin 2010, pas krizës ekonomike globale të viteve 2007-2008.
Në vitin 2012, ai bëri histori si anëtari i parë i Kongresit amerikan që martoi partnerin e tij të së njëjtës gjini, James Ready.
Pas largimit nga politika në vitin 2013, Barney Frank vazhdoi të mbetej një zë i rëndësishëm në debatet publike dhe në mbrojtje të të drejtave civile në SHBA.
