Për ndeshjen e radhës me Luftëtarin në Gjirokastër, trajneri i Vllaznisë, Armando Cungu, ka vendosur të bëjë disa ndryshime, që prekin të tre repartet e skuadrës shkodrane.
Këtë ka lënë të kuptohet ai me testet e ndryshme që ka bërë gjatë javës. Në mbrojtje ai ka menduar t’i besojë Markut për krahun e majtë, duke lënë në stol Gurishtën. Ndoshta një “penalizim” për gabimin me Teutën, pasi ishte pikërisht Gurishta, që nuk e mbuloi si duhet Çyrbjen në rastin e golit të Teutës.
Pjeshka, Orelesi dhe Gocaj janë mbrojtësit e tjerë. Në mesfushë ka ardhur momenti i Bardullës dhe Çinarit, të cilët pritet të zënë përkatësisht vendet e Vucajt dhe Krujës. Hasani dhe Krymi janë të sigurt në këtë repart, ashtu si dhe kapiteni Gilman Lika.
Për sulmin duket se ka balotazh mes afrikanit Atsina dhe fierakut Ribaj, me këtë të fundit më të favorizuar për të qenë titullar në Gjirokastër.
