“El Clasico” i parë sezonal i shkon Real Madrid, me djemtë e Mourinho-s që triumfojnë brenda në “Camp Nou” duke rihapur garën në Spanjë pikërisht atëherë kur dukej se Barça ishte e pathyeshme. Fill pas disfatës në derbi përballë Atletico-s, Reali regjistron 5 fitore radhazi mes La Liga-s dhe Champions, shifra këto që tregojnë qartë se “Speciali” ka rikthyer ekipin në garë me kohë të plotë. Humbja ndaj PSG në Champions ishte sinjali i parë për Barçën, ishte humbja e parë sezonale, por tani ekipi i Hansi Flick bie edhe në La Liga duke bërë që diferenca me Real Madrid të ngushtohet në 3 pikë. Heroi për Realin në këtë super sfidë ishte Kylian Mbappe, me “gjelin” francez që dhuroi një paraqitje të denjë për “Topin e Artë”.
Në golin e parë, në minutën e 41-të, Mbappe ishte thjesht me fat teksa devijoi topin në rrjetë. Në fraksionin e dytë, Barça reagoi me të përhershmin Raphinha. Kapiteni mori një top të bukur brenda në zonë nga Pedri në minutën e 61-të dhe me një goditje të saktë barazoi shifrat në 1-1. Katër minuta më vonë, Barça i shkoi shumë pranë edhe golit të dytë, por portieri Lunin bëri mrekullinë duke devijuar goditjen me kokë të Gerard Martin. Nuk ishte në mbrëmjen e tij më të mirë Lamine Yamal, me talentin spanjoll që bëri shumë pak për të lënë gjurmë në këtë “El Clasico”. Momenti më përcaktues i këtij takimi erdhi në minutën e 87-të, ku Camavinga me një aksion personal fantastik, besoi deri në fund, duke dhuruar një assist të pastër për Kylian Mbappe, me “bomberin” francez që nuk fali duke tundur rrjetën, një gol që në fund rezultoi një trepikësh pasi rezultati mbeti i pandryshuar.
Me të drejtë, shijon këtë sukses në “El Clasico”, Jose Mourinho: “Pikësëpari, ishte një ndeshje shumë e bukur, një ndeshje e një niveli shumë të lartë. Të dy ekipet u përpoqën të fitonin, por djemtë e mi zhvilluan një paraqitje të jashtëzakonshme. Ishim shumë të organizuar dhe treguam guxim”, u shpreh Jose Mourinho në konferencë për shtyp.
Nuk e priti mirë këtë humbje trajneri Hansi Flick: “Jemi të zhgënjyer, na mungoi freskia. Kjo ishte humbja jonë e parë pas 9 fitoreve radhazi në La Liga, por këto gjëra ndodhin. Në ndeshjet e mëdha, detajet janë shumë të rëndësishme, këtë herë nuk shkuan në favorin tonë”, u shpreh Flick.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
