Arsenal “thyen” 2-1 Chelsea në derbin e Londrës, me ekipin e Artetas që tregoi karakter dhe klas duke përmbysur blutë në një sfidë shumë të bukur dhe me emocione deri në sekondën e fundit. Në “Emirates”, Chelsea befasoi Arsenal që në minutën e 2-të ku një goditje e Rogers kapi të papërgatitur portierin Raya duke bërë që në stadium të pllakoste heshtja.
Arsenal reagoi fuqishëm dhe në minutën e 12-të Calafiori mes kaosit arriti të dërgojë topin në rrjetë, por pasi rishikoi aksionin në VAR, gjyqtari i takimit anuloi gjithçka për pozicion jashtë loje. Pavarësisht golit të anuluar, goli ishte çështje kohe dhe në minutën e 25-të, Kai Havertz me një goditje shumë të bukur në kufijtë e zonës mposhti portierin Martinez duke barazuar shifrat në 1-1.
Në fillimin e pjesës së dytë, me një aksion shumë të bukur, Arsenal gjeti edhe golin e dytë me Odegaard duke përmbysur rezultatin. Bëri pjesën e tij në këtë derbi edhe portieri Raya, me spanjollin që mbajti portën të paprekur duke i dhuruar “topçinjve” një trepikësh të artë. Me 9 pikë në 3 javë, Arsenal kap Man.City në krye të Premier League.
Pas ndeshjes, Mikel Arteta u shfaq shumë i kënaqur me lojën e shfaqur nga ekipi i tij dhe sigurisht për këtë start perfekt në Premier League: “Nuk ishte një fillim i lehtë, por reaguam në mënyrë të shkëlqyer. Më pëlqeu shumë mënyra se si luajtëm, edhe pse rrezikuan jo pak. Ishte kënaqësi të shijoja një ndeshje të tillë. Jemi shumë të kënaqur me këtë fillim sezoni, duhet të vazhdojmë kështu pasi rruga është shumë e gjatë”, u shpreh Arteta.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
