Showgirl-i i njohur argjentinas Belén Rodriguez ka lënë spitalin Policlinico në Milano, pasi u shtrua pas një alarmi që mobilizoi policinë, ambulancën dhe zjarrfikësit në zemër të qytetit. Sipas zyrës së shtypit të spitalit, 41-vjeçarja është në gjendje të mirë shëndetësore dhe është liruar pas vlerësimeve mjekësore.
Ngjarja ka ndodhur në mëngjesin e së hënës, më 25 maj, rreth orës 07:00, në një ndërtesë elegante pesëkatëshe në lagjen Brera të Milanos. Sipas mediave italiane, një fqinj ka dëgjuar britmat e një gruaje që vinin nga apartamenti i Belén Rodriguez. “Ndihmë, më ndihmoni!”, thuhet se është dëgjuar për disa minuta nga dritarja e banjës së saj, çka ka shtyrë banorët të njoftojnë menjëherë numrin e emergjencës 112.
Pas alarmit, në vendngjarje mbërritën dy patrulla policie nga komisariati Garibaldi-Venezia, një ambulancë dhe zjarrfikësit, duke krijuar edhe bllokim trafiku në rrugën e ngushtë ku ndodhet banesa. Forcat e rendit bllokuan hyrjen për automjetet dhe krijuan një korridor emergjence, ndërsa raportohet se pati një negociatë rreth tre orëshe me Rodriguez, e cila vendosi të hapte derën vetëm kur zjarrfikësit po përgatiteshin të hynin me forcë.
Burime nga vendngjarja kanë bërë me dije se showgirl-i dukej në një gjendje të rënduar fizike dhe emocionale. Pas ndërhyrjes së mjekëve, ajo u transportua drejt spitalit me kod të verdhë për kontrolle dhe vlerësim të mëtejshëm. Fatmirësisht, pas trajtimit, Belén është liruar dhe gjendja e saj është përshkruar si e stabilizuar.
Por kjo nuk është e vetmja ngjarje që ka vendosur emrin e saj në qendër të lajmeve ditët e fundit. Sipas raportimeve, dy dëshmitarë kanë deklaruar në polici se e kanë parë Belén Rodriguez duke drejtuar një SUV tip Land Rover Defender, i cili dyshohet se është përfshirë në dy aksidente të ndara gjatë mbrëmjes së së shtunës.
Aksidenti i parë raportohet të ketë ndodhur rreth orës 19:30 në Via Melzi d’Eril, pranë Arco della Pace, ku automjeti dyshohet se ka goditur pasqyrën e një makine të parkuar. Pak minuta më vonë, rreth dy kilometra më larg, në Via San Marco në zonën e Brera-s, SUV-ja thuhet se ka goditur një motoçikletë dhe tre automjete të tjera të parkuara.
Fatmirësisht, në të dyja rastet nuk raportohet për persona të lënduar. Megjithatë, sipas dëshmitarëve, drejtuesi i mjetit nuk është ndalur për të dhënë të dhënat e nevojshme dhe ka vijuar lëvizjen. Dy persona pretendohet se e kanë identifikuar Rodriguez në timon dhe kanë realizuar edhe fotografi.
Aktualisht, policia lokale po heton për të identifikuar pronarin e mjetit, i cili rezulton i lidhur me një kompani, si dhe për të verifikuar kush e drejtonte automjetin në momentin e incidenteve. Ndërkohë, emri i Belén Rodriguez vijon të jetë në qendër të vëmendjes mediatike në Itali.
