Pas një mungese të gjatë nga media, Najada Konomi, e njohur nga publiku si një nga personazhet më të komentuar të edicionit të parë të “Big Brother Albania”, është rikthyer sërish në vëmendje përmes një interviste në emisionin “Goca dhe Gra”.
Ish-banorja, e cila në atë kohë u bë shumë e njohur për historinë e saj të dashurisë me Olsi Mingomatajn, ka ndarë detaje nga periudha pas përfundimit të spektaklit, duke treguar se fama e menjëhershme ndikoi ndjeshëm në jetën e saj personale. Najada rrëfeu se eksperienca në “Big Brother 1” ishte krejt ndryshe nga formatet që shohim sot. Sipas saj, banorët e asaj kohe ishin më të papërgatitur dhe më naivë përballë një vëmendjeje kaq të madhe publike.
Ajo kujton se pas daljes nga shtëpia, njerëzit i ndalonin vazhdimisht në rrugë dhe interesoheshin për marrëdhënien e saj me Olsin. Nëse e shihnin vetëm, pyetja që i drejtonin më shpesh ishte: “Ku është Olsi?”, ndërsa e njëjta gjë ndodhte edhe me ish-partnerin e saj, të cilin e pyesnin për Najadën.
“Ka qenë ndryshe në Big Brother-in e parë, ne ishim shumë naivë. Ishim të papërgatitur për gjithë atë bujë. Njerëzit na ndalonin kudo. Nëse më shihnin vetëm, më pyesnin për Olsin, dhe e njëjta gjë ndodhte edhe me të për mua,” u shpreh ajo.
Megjithatë, me kalimin e kohës, Najada tregoi se ndjesia e famës filloi të zbehej dhe ajo ndjeu nevojën për më shumë privatësi në jetën e saj.
“Unë jam tip që më pëlqen vëmendja, por vetëm në fillim ishte ashtu. Më pas ndjeva që doja hapësirën time dhe një jetë më private,” shtoi ajo.
