Ana Dyrmishi, 25-vjeçarja që pësoi djegie në mbi 85% të sipërfaqes së trupit pas zjarrit në hotelin ‘Brooklyn’ në Vlorë, ka ndërruar jetë. Mes dhimbjes dhe lotëve familjarë dhe miq do t’i japin të resë lamtumirën e fundit në Durrës, vendi ku jetonte.
Sipas mediave Ana Dyrmishi kishte kishte shkuar në Vlorë me të fejuarin e saj Arnaldon, për të festuar ditën e parë zyrtare të fejesës. Një udhëtim që duhej të ishte një nga momentet më të bukura të çiftit, u shndërrua në një tragjedi, pasi hoteli në Lungomare u përfshi nga zjarri mëngjesin e 16 gushtit. Në përpjekje për të shpëtuar, pushuesit u detyruan të hidheshin edhe nga ballkonet për t’u shpëtuar flakëve.
Ana pësoi djegie në rreth 85% të trupit. E reja u transferua drejt Turqisë me mbështetjen e qeverisë shqiptare për të marrë një trajtim mjekësor më të specializuar, por fatkeqësisht nuk mundi të mbijetojë plagëve të marra, duke ndërruar jetë në spitalin në Turqi. Edhe i fejuari i saj, pësoi dëmtime të rënda, rreth 35% djegie në trup. Ai është dërguar nga familjarët në Itali për trajtim të specializuar
Zjarri nisi në katin e parë të hotelit për shkak të defektit në prizën elektrike të frigoriferit. Brenda godinës së “Brooklyn Hotel” në pronësi të Manushaqe Abazit, kishte dhe pushues të tjerë të huaj të cilët fatmirësisht shpëtuan pa lëndime.
