Gjatë vizitës në Spanjë kryeministri Edi Rama i ka dhuruar homologut të tij Pedro Sanchez një palë këpucë të kuqe me xhufka. Argjiroja.net mëson se këto këpucë kishin mbërritur nga Gjirokastra teksa janë punuar nga artizanët lokalë.
Mësohet se këpucët me xhufka janë pjesë e kostumit tradicional të Gjirokastrës. Ato janë veshur kryesisht nga valltarët e grupeve popullore dhe isopolifonisë, por përdoreshin masivisht edhe me raste e ngjarje festive. Në vitin 1959 kur Nikita Hrushovi vizitoi Shqipërinë, disa mjeshtra gjirokastritë përgatitën këpucë me xhufka të cilat iu bënë dhuratë udhëheqësit të Bashkimit Sovjetik. Dekada më parë Gjirokastra ka pasur mjeshtra për këto këpucë si Miho Burdhima, Andrea Kaçi, Zilfo Bakiri, Niko Curi, Theodhori Lile, Sokrat Kristo.
Siç shihet në foton e publikuar nga Rama, kryeministri i Spanjës është i kuriozuar teksa mban në duar këpucët me xhufka. Le të shpresojmë që të paktën t’i kenë gjetur numrin e saktë të këmbës, ndonëse zor të mendosh se ai do t’i veshë ndonjëherë. Mund t’i mbajë thjesht si një kujtim i bukur me vlerë simbolike nga homologu i tij shqiptar. ©Argjiroja.net
