Arritjen më të madhe Kimi Antoneli e realizoi duke fituar në Monza, pasi ishte nisur nga rreshti i parafundit. Por e dyta ishte po aq e rëndësishme, pasi me suksesin e tij në Çmimin e Madh të Italisë, ai arriti të shpërthente në gëzim edhe tifozët e Ferrarit, në një të diel të zezë për skuadrën nga Maranelo.
Andrea Kimi Antoneli bëri diçka që vështirë se mund të imagjinohej, sidomos po të kemi parasysh se sa shumë tifozët e “Kokëkuqes” kanë sytë dhe zemrën vetëm për “Kalin e Përjetshëm”. Pasi derdhën lot të hidhur për daljen e Lëklerkut nga gara dhe kuptuan se Hamiltoni nuk do të fitonte dhe as nuk do të ngjitej në podium, tifozët e Ferrarit nisën të brohorisnin për Kimin.
Në vend që të largoheshin nga tribunat, siç ndodh kur skuadra e zemrës është një hap larg humbjes, ata e mbështetën pilotin nga Bolonja në duelin e tij me Rasëllin. Nisën të valëvitnin flamurin italian në çdo kalim të tij, e shtynë me brohoritjet e tyre deri në vijën e finishit dhe, me një shpërthim të jashtëzakonshëm në fund, e përshëndetën fitoren e tij.
U ngritën në këmbë për ta duartrokitur gjatë xhiros së nderit dhe më pas vrapuan poshtë podiumit për të kënduar së bashku me të himnin kombëtar italian. Dhe pas ceremonisë zyrtare të festimeve, erdhi përqafimi i turmës së Monzës. Antoneli u la të ngrihej triumfalisht mbi duart e tifozëve, i mbajtur pezull në ajër. Sikur të mos ishte i veshur me ngjyrat e argjendta të Mercedesit. Sepse Ferrari vjen gjithmonë e para.
Por është e pamundur të mos dashurosh këtë djalosh kaçurrel, i cili po shkruan historinë e sportit italian, edhe pse drejton një Mercedes, të paktën për momentin…
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
