Dy ditë më parë gjatë një eventi me rastin e 50 vjetorit të themelimit të Teatrit ‘Zihni Sako’ në Gjirokastër, kryebashkiakja Zamira Rami i kërkoi publikisht ministres së Kulturës, Mirela Kumbaro, mbështetje për rikonstruksionin e godinës dhe në mënyrë specifike për ngrohjen e tij. Teksa pranoi pa komplekse që një pjesë e investimeve të rëndësishme në Gjirokastër janë mbështetur prej Ministrisë së Kulturës, kuptohet edhe sepse vetë ministrja është në zonën e saj elektorale, Zamira Rami tha:
“Në takimin e ardhshëm teatral, ne ta kemi të rikonstruktuar godinën e teatrit , të paktën me ngrohje. Vjen dimër përpara dhe që të shijosh shfaqjet, të marrësh emocionet duhet të kesh disa kushte”.
Ndërkohë vetë ministrja Kumbaro u shpreh se patjetër që Gjirokastra e meriton një teatër më të mirë dhe kjo është arsyeja pse është gjithmonë në krye të listës kur vjen puna tek investimet. Ajo solli këtu në vëmendje edhe kritikën që i patën bërë disa ditë më parë në Kuvend për shpërndarjen e investimeve, duke favorizuar Gjirokastrën më tepër se çdo zonë tjetër.
Realisht Gjirokastra ka përfituar shumë investime nga qeveria qëndrore dhe me mbështetje të donatorëve të tjerë këto 5 vitet e fundit. Mjafton të përmendim faktin që përmes Ministrisë së Kulturës hyri në Gjirokastër Fondi Shqiptaro Amerikan i Zhvillimit me restaurimin e Pazarit, si dhe Banka Botërore për restaurimin e kalldrëmeve. Shumë prej investimeve në Gjirokastër mbajnë ‘vulën’ e qeverisë sepse është logjike që ka më shumë mundësi financiare dhe kredibilitet më të madh për të hyrë në negociata me dontorët e huaj.
Të kuptohemi, nuk jemi dukë thënë që kjo është qeveria më e mirë në botë dhe se tani s’ka më nevojë për investime në Gjirokastër. Por nëse ndalemi specifikisht vetëm të ngrohja e teatrit ‘Zihni Sako’, çështje së cilës i mëshoi kryebashkiakja Zamira Rami, ngjan më shumë të jetë një ‘pasim topi’ nga Bashkia te Qeveria. Përse e themi këtë?! Të kërkosh një teatër modern dhe më të mirë në Gjirokastër natyrisht që është kërkesë legjitime dhe kërkon investim të madh prej qeverisë. Por nëse flasim së paku për ngrohje të sallës në kushtet ekzistuese, me siguri që ky është një investim i munguar nga vetë Bashkia Gjirokastër në këto 3 vite e pak qe drejtohet prej Zamira Ramit.
Pra, një sistem ngrohje me kaldaja mund të ishte realizuar nga vetë bashkia, ashtu sikundër u realizua në shkollat 9-vjeçare të qytetit disa muaj më parë. Aq më tepër nëse kthehemi pas në kohë, për ngrohjen e sallës ka qenë vetë kryeministri Edi Rama që i lëshoi një ‘shuplakë’ Flamur Bimes e Zamira Ramit tre vjet më parë.
“Shumë respekt për rezistencën tuaj në këtë frigorifer, që mund të përballohet vetëm me dashurinë e madhe për Partinë Socialiste”- deklaronte Rama në dhjetor 2015 gjatë një takimi në Gjirokastër në kuadër të fushatës “Ta pastrojmë më tej Shqipërinë”.
Me siguri që kritika e tij i adresohej Flamur Bimes që për 12 vjet nuk e ngrohu që s’e ngrohu dot atë sallë, po aq edhe Zamira Ramit, edhe pse ajo kishte pak muaj që kishte nisur mandatin si kryebashkiake. Sot, rreth 3 vjet më pas s’ka ende një sistem ngrohje në atë sallë. T’i kërkosh para qeverisë për teatër të ri apo rikonstruksionin e atij ekzistues është krejt normale, por mungesa e ngrohjes me një sistem të thjeshtë kaldajash për gjithë këto vite, ngjan të jetë së tepërmi një dështim i Bashkisë Gjirokastër sesa përgjegjësi e qeverisë. Le të bëhemi seriozë, t’i kërkojmë qeverisë dhe Mirela Kumbaros fjala vjen mbështetje për rindërtimin e Aeroportit të Gjirokastrës. Ta ulësh stekën në ca kaldaja e tuba për sistemin e ngrohjes duket si muhabet banal që natyrisht mos prisni të preokupojë qeverinë. As këtë ekzistuesen dhe as të tjerat që do vijnë.
©ArgjiroLajm.net
