Ministri i Mbrojtjes Niko Peleshi ka bërë me dije se është ulur numri i vatrave aktive në vend, ndërsa është shprehur se vatrat serioze të zjarreve mbeten në Kukës, Mirditë dhe Vlorë.
“Eshtë ulur numri i vatrave aktive por kemi ende vatra serioze në Kukës, Mirditë dhe Vlorë. Heroizëm dhe bashkimi i forcave ka shmangur rrezikun e prekjes se fshatit nga zjarri në Dukat. Sot, prej orëve të para të mëngjesit kemi rifilluar operacionet nga ajri dhe toka në Kukës (Thirrë) dhe Karaburun” tha Peleshi.
“Dy vatra në qarkun e Kukësit janë më problematike. Në Mirditë po ashtu kemi një vatër serioze. Në Durrës kemi një vatër të menaxhueshme. Të gjithë kanë punuar me heroizëm.
Pas nesh duken dy vatra, më e madhja është në gropë dhe është e rrethuar nga zona të djegura. Në situata të tilla duhen edhe profesionalizmi dhe heroizmi. Unë kam pare heroizëm dhe profesionalizëm tek të gjithë ata që kanë punuar”- u shpreh ministri Peleshi.
I pyetur nëse punonjësit kanë mjetet e duhura për të shuar flakët, Peleshi tha ashtu e në të gjithë botët mjetet janë të pamjaftueshme.
“Ata kanë mjetet e duhura, por kanë mjete të pamjaftueshme ashtu si në të gjithë botën. Keni dëgjuar apele për ndihmë nga Greqia dhe Turqia. Janë situata shumë komplekse,por nuk na kanë gjetur të papëtrgatitur. Jemi në luftë me fenomene natyre dhe nuk dua të them se ia kemi dalë pasi kemi kaluar shumë vështirësi të mëdha.
Është menaxhuar shumë mirë deri tani. Ka dy helikopterë të ardhur nga BE. Ata nuk punojnë në një kohë. Njëri qëndron i parkuar në Rinas, i treti është ai i Çekisë dhe është dërguar në Kukës”- u shpreh ai.
Peleshi më tej tha se flakët në Vlorë rrezikojnë Parkun e Llogarasë.
“Rrezikohet Llogaraja prandaj ne jemi këtu ditë e natë. Duam të shmangim kapërcimin e zjarrit tek parku. Nëse fillon djegia e tij do të jetë një situatë që nuk do të kemi çfarë të bëjmë as nga ajri. Por nuk do të shkojmë në atë situate”- tha Peleshi.