Nga Sheperi i Zagorisë, në eventin e organizuar në përkujtim të 81-vjetorit të Brigadës së VIII sulmuese, deputetja Mirela Kumbaro njoftoi se brenda mandatit të katërt do të përfundojë Unaza e Çajupit, që bashkon fshatrat e Zagorisë me ato të Pogonit dhe Dropullit.
“Nderim dëshmorëve të atdheut nga Sheperi i Zagorisë ku rikthehem sërish me ftesën e Organizatës së Veteranëve Gjirokastër-Libohovë dhe zagoritë të tjerë për të rikujtuar 81-vjetorin e Brigadës së VIII Sulmuese në një ngjarje që na bën krenarë për të shkuarën antifashiste, por na krijon po aq mundësi për të ardhmen, për ta kthyer historinë në një atraksion turistik e për të tërhequr më shumë vizitorë. Me rrugën e re që po ndërtohet, ku fshatrat e Zagorisë afrohen me Gjirokastrën e Libohovën, do të jemi edhe më të shumtë në këtë trevë bashkë më turistë e vizitorë që do të mund t’i falen kësaj bukurie të natyrës, për të sjellë mirëqenie për banorët duke krijuar zinxhirin e ekonomisë së turizmit përmes bujtinave, agroturizmeve dhe eventeve turistike”, u shpreh Kumbaro.
