Kryeministri Edi Rama dhe kryetari i Partisë Demokratike Lulzim Basha kanë mbërritur në selinë e Presidencës, ku pritet të zhvillohen bisedime për zgjidhjen e krizës politike. Rama ka prefuar të përshkrojë në këmbë rrugën drejt Presidencës, ndërsa Basha ka shkuar me automjet.
Në pamjet e para të shpërndara për mediat, bie në sy fakti se takimi është zhvendosur në sallonin ku zakonisht Nishani bën pritje të ndryshme protokollare, ndërsa takimi i herës së parë ishte tipik një mjedis negociatash ku palët qëndronin përballë njëra-tjetrës në tavolinë.
Pra, të paktën prej këtyre pamjeve kuptohet se ishte më së shumti një takim kortezie, që ndoshta i paraprin një tjetër takimi negociues mes palëve. Sidoqoftë mbetet për t’u parë se çfarë do të prodhojë ky takim i dytë brenda kësaj jave mes Ramës dhe Bashës. Opozita ndërkohë po mobilizohet për protestën e 7 majit në Kavajë.
