Një shqiptar është kthyer në hero në Itali, teksa ka shpëtuar jetën e katër qytetarëve. Mediat italianeraportojnë se një makinë ka marrë flakë në ecje, duke bllokuar brenda katër të rinj italianë.
Shoferë të shumtë kanë parë makinën në zjarr, por kanë ndaluar vetëm për të bërë foto. Ka qenë një qytetar i ri shqiptar, i cili ka ndaluar dhe i është afruar makinës në flakë, duke nxjerrë prej saj një vajzë dhe tre djem.
“E pashë veturën në zjarr dhe u ndala. Ishin 4 të rinj brenda, një vajzë dhe tre djem, të cilët dukeshin të tronditur, ndoshta nga tymi. I tërhoqa ata nga makina. Ishte e vetmja gjë që duhet të bëja”, tha i riu shqiptar për mediat e vendit fqinj.
Incidenti ndodhi mëngjesin e sotëm, rreth orës 08:30, pas një përplasjeje mes dy mjeteve, Fiat Punto dhe Peugeot, ku kjo e dyta mori flakë, në zonën e San Martino di Trecate.
