23 kilometra larg Sarandës ndodhet fshati Navaricë, i banuar nga qytetarë të kombësisë shqiptare mes një zone ku në shumicë jeton minoriteti grek i Bashkisë Finiq. Gazetari Kristaq Xhaji i RTSH Gjirokastra ka realizuar një reportazh në këtë fshat me resurse të shumta natyrore e plantacione me agrume. Pas rikonstruksionit të rrugës, Navarica ka hyrë së fundi edhe në hartën e fshatrave të frekuentuara nga turistët.
Janë ndërtuar dy restorante, një bujtinë dhe pritet të ketë iniciativa të tjera private në agroturizëm. Siç tregojnë banorët fshati ka pasur dikur 13 mullinj që punonin me ujë ndërsa sot funksionon vetëm njëri prej tyre, i cili ruhet me fanatizëm nga familja e Krenar Kasos.
Navarica është e njohur edhe për burimin e famshëm të Vrizit, që furnizon me ujë prej 60 vitesh qytetin e Sarandës. Krahasuar me fshatra të tjerë të kësaj zone nuk është prekur shumë nga emigracioni. Vijon ende të jetë ndër fshatrat më të banuar të Bashkisë Finiq. Banorët kërkojnë gjithashtu investime të tjera në ndriçimin publik, qendrën shëndetësore dhe të një pjese të rrugës që ka mbetur pa u asfaltuar. Në videon më poshtë shihni të plotë reportazhin e gazetarit Kristaq Xhaji. ©Argjiroja.net