Një aksident i rëndë ka ndodhur pasditen e kësaj të premteje në qytetin e Vlorës, në aksin e njohur si Transballkanikja. Shkak është bërë një automjet tip Benz ML me ngjyrë të zezë që nuk i është bindur urdhrit të policisë në një postbllok për të ndaluar.
Forcat e rendit i janë vënë nga pas dhe në përpjekje për t’u shpëtuar uniformave blu makina në ndjekje ka shkaktuar një aksident zinxhir ku janë përfshirë disa automjete. Siç duket edhe nga pamjet në aksident janë shënuar dëme të konsiderueshme materiale.
Raportohet se makina tip Benz ka aksidentuar edhe një automjet të Policisë së Burgjeve, të cilin e ka nxjerrë nga rruga. Dëmtime ka pasur edhe në një shtyllë ndriçimi ndërsa për shkak të ngjarjes në zonë është krijuar një trafik i rënduar.
Fatmirësisht, nuk raportohet për persona të lënduar. Drejtuesi i automjetit Benz ML thuhet se është shoqëruar në ambientet e Policisë për veprime të mëtejshme hetimore.
