Shkollimi gjatë pandemisë zgjeroi hendekun për sa i përket mundësive arsimore mes të pasurve dhe të varfërve. Një studim i fundit i Organizatës për Bashkëpunim dhe Zhvillim Ekonomik ka dalë në përfundimin se pasojat e mësimit në kushtet e pandemisë do të ndikojnë në të ardhmen e brezave për një kohë të gjatë.
Fëmijët me akses në internet dhe në teknologji kanë dalë me rezultate më të larta në mësime. Privilegjimi i të ardhurave ka krijuar mundësi alternative të të mësuarit, ndërsa pjesa më pak e avantazhuar ka mbetur e izoluar.
Moskryeja e orëve mësimore do të çojë në humbje të aftësive që lidhen me produktivitetin e njerëzve shkruhet në studim. Humbja e produktiviteteti parashikohet të sjellë një rënie prej 1.5% të prodhimit ekonomik global për pjesën tjetër të këtij shekulli.
Studimi vlerëson gjithashtu se ndërsa hyjmë në fazën e rimëkëmbjes nga COVID-19, duhet që sistemet arsimore të reflektojnë, sidomos arsimi profesional.
Pothuajse një e treta e shkollave në të gjithë botën u mbyllën për të frenuar përhapjen e Covid-19. Me ardhjen e shtatorit, institucionet arsimore kanë filluar të rihapen, por sfida të mëdha mbeten ende për sa sa i përket kushteve të kryerjes së mësimit duke shmangur infektime të mundshme.
