Pas ikjes nga Luftëtari, Milinkoviç prezantohet sot te Kukësi

Tashmë është zyrtare, Mladen Milinkovic do të jetë trajneri i ri i Kukësit. Serbi që vitin e kaluar drejtoi Luftëtarin ka firmosur me Kampionët e Shqipërisë dhe pritet të marrë sot detyrën e re, ndërsa do të prezantohet në orën 11:00 në zyrat e Klubit të Kukësit.
Gjatë ditës së djeshme, Milinkovic bashkë me menaxherin e tij kanë patur një takim me presidentin e Kukësit në Tiranë, i cili ka rezultuar i frytshëm për të dyja palët dhe është mbyllur me shtrëngim duarsh.
Te Kukësi, Milinkovic zë vendin e të larguarit Ernest Gjoka, që u shkarkua pavarësisht se kishte fituar titullin e parë në histori të Kukësit duke vuajtur pasojat e eliminimit në Champions League.
Milinkovic bëhet serbi i dytë që merr drejtimin e Kukësit, pasi më parë verilindorët janë drejtuar dhe nga Miodrag Radanovic. Bashkë me Milinkovicin pritet të zyrtarizohet këtë të shtunë dhe afrimi i një futbollisti, ish-kapitenit të Vllaznisë Ndricim Shtubina.