Sot është zyrtarizuar dorëheqja e Dino Selimit nga posti i drejtorit të Drejtorisë Rajonale të Shërbimeve të Transportit Rrugor në Gjirokastër, apo siç njihet ndryshe drejtoria e patentave. Largimi i tij vjen pak ditë pas vizitës së kryeministrit Edi Rama në Gjirokastër. Dino ishte në krye të këtij institucioni prej 5 vitesh. Por kush do të jetë pasuesi i tij në këtë post?
Deri më tani s’ka ende emra të zyrtarizuar, por ka zëra që flasin se kjo drejtori do t’i lihet sërish dikujt nga Tepelena. Është si të thuash një lloj dakordësie mes socialistëve për ndarjen e ‘tepsisë’, që drejtoria e patentave t’i besohet dikujt nga ky rreth, për të balancuar në këtë mënyrë pushtetin në rang qarku. Emri më i mundshëm është ai i Matilda Çelës, e cila ka qenë në listën e kandidatëve për deputetë të PS-së në qarkun Gjirokastër.
Nëse Çela do të shkonte në këtë institucion, me siguri që ajo do të ishte e para femër në krye të drejtorisë së patentave. Është disi e pazakontë pasi institucione të tilla janë drejtuar historikisht nga meshkujt. Por kjo s’e përjashton zyshën e gjimnazit ‘Abaz Shehu’ në Tepelenë, aq më tepër kur jemi në kushtet që Edi Rama vazhdon të jetë i obsesionuar pas promovimit të femrave në qeveri dhe institucionet në varësi të saj. Nëse ajo zëvendëson Dino Selimin te Patentat, në Gjirokastër bëhen dy anëtarë të familjes Çela që drejtojnë institucione në Gjirokastër. Kujtojmë këtu që motra e Matilda Çelës drejton Degën e Thesarit.
©ArgjiroLajm.net
