I treti në radhë për t’u shitur nga Luftëtari, pas Bregut dhe Abazajt, është mesfushori Eduard Rroca. Numri 10 i gjirokastritëve nuk luajti në ndeshjet e fundit të kampionatit, për shkak të një dëmtimi, por tani po merr veten gradualisht dhe do të jetë plotësisht gati për ndeshjet e Europa League.
Te Luftëtari ka pasur disa largime së fundi, përveç Bregut dhe Abazajt, ndërkohë që ka mbetur ende pezull çështja e trajnerit Hasan Lika. I pyetur për të ardhmen, Rroca ka thënë shkurt: “Do të luajë në Europë me Luftëtarin, më pas të shohim”. Mesfushori mezi pret të shijojë aventurën europiane me Luftëtarin.
Në fakt, duket e vështirë që gjirokastritët ta mbajnë këtë lojtar edhe në të ardhmen, duke parë interesin që ka për të nga jashtë dhe brenda vendit. Mësohet se për Rrocën ka interes nga Greqia, por edhe nga dy skuadrat e kryeqytetit, Partizani dhe Tirana. Madje, të kuqtë, të cilët e kanë vënë në shënjestër mesfushorin që në merkaton e janarit, duket se këmbëngulin më shumë. Por edhe Tirana, që po organizohet pas kthimit të saj në elitën e futbollit shqiptar, e ka në planet e saj Rrocën.
Ndoshta një ofertë nga Greqia do të ishte interesante, por edhe Partizani dhe Tirana do të shënonin një rritje në karrierën e mesfushorit që spikati me Luftëtarin. Tani duhet pritur aventura europiane e Luftëtarit, për të mësuar saktësisht të ardhmen e Rrocës.
