Tre ditë më parë në mbledhjen me strukturat e PD-së në Gjirokastër, deputeti Tritan Shehu tha se projekti për rrugën Kardhiq-Delvinë dhe Bypassi i Tepelenës janë gënjeshtra me bisht e Edi Ramës.
“Disa javë më parë tha që brenda një jave do të fillojnë punimet në rrugën Kardhiq-Delvinë, tha që brenda një jave do fillojnë punimet në Bypassin e Tepelenës. Ku jemi? Gënjeshtër me bisht! As ka ndërmend të fillojë kurrë, sepse mendja dhe vizioni është kthyer në mbushjen e një thesi. Kjo qeveri e ndjen veten në ikje dhe do të përfitojë sa më shumë në ikje e sipër”, tha Shehu.
Por ndërkohë paraditen e sotme në Tepelenë u zhvillua ceremonia për nisjen e punimeve, ku merrte pjesë kryeministri Rama, ministrat Gjiknuri e Kumbaro, deputetët Cuçi e Golemi, si dhe zyrtarë të tjerë të qeverisë. Pasi doli ‘huq’ me këtë deklaratë në Gjirokastër, deputeti Tritan Shehu bëri sot një reagim në faqen e tij në Facebook, ku shfaq pakënaqësi për projektin. Sipas tij ky nuk është një bypass, por një riparim rruge. Në fund Shehu i kërkon Ramës të pyesë kryebashkiakun Tërmet Peçi, se si po shkon kultivimi i kanabist në Tepelenë. Më poshtë reagimi i tij i plotë:
Kryeministri yne “surrealist” kërkon që shqiptarët ta shikojnë Shqiperinë, Tepelenën, Gjirokastrën vetëm nëpërmjet syzave të tij 3D! Mbasi publikuat sot në fb tuaj një vizatim foshnjarak në 3D për të ashtuquajturin “by pass” të Tepelenës, jeni rrugës duke shkuar vetë aty për të mashtruar njerëzit…
Një By pass ky që vetem By pass nuk është. Kërkoni të harxhoni shumë miliona Euro për disa riparime të rreth-rotullimit egzistues tek Sheshi “Ali Pasha”, për disa troture poshtë kalasë, që vetëm riparim u duhet, për një “riveshje” të rrugës 2 km e veshje me pemë të saj, kur aty pemë ka me shumicë etj si këto. Ky qenka By Pass i Tepelenës i shpallur me shumë zhurmë nga ju disa muaj më parë, punimet e të cilit do fillonin prej kohësh!!!
Po rruga Kardhiq- Delvinë ku është, e keni deklaruar disa here në 3D?! Dicka, kur t’i afroheni Fierit kujtohuni edhe për atë By Pass të vërtetë aty; e keni harruar prej 5 vitesh? Së paku na ngushëlloni me 3D! Dhe së fundi, gjatë festës së sotme që do keni me Tërmetin, pyeteni atë se si po ecën tani kultivimi masiv i kanabisit, prej Tepelenës në Vlorë, duhet të jetë i mirëinformuar, e ka për detyrë edhe sipas ligjit.
© ArgjiroLajm.net
