Partia Demokratike e vulës së Lul Bashës, Enkelejd Alibeajt dhe Gaz Bardhit do të ketë kandidat edhe në Bashkinë Gjirokastër. Argjirolajm.net mëson se është regjistruar zyrtarisht Shemsho Lamaj. Ai ka qenë më parë pjesë e strukturave vendore të PD-së në Gjirokastër, si dhe drejtues i dikurshëm i Drjetorisë së Bujqësisë.
Me humbjen e pushtetit në vitin 2013, Lamaj kandidonte për të marrë drejtimin e Partisë Demokratike në Gjirokastër përballë Roland Bejkos. Asokohe Lamaj mbështetej nga grupimi i Genc Rulit, ndërsa Bejko kishte mbështetjen e Lulzim Bashës. Gjatë atij procesi pati përplasje verbale dhe akuza për manipulim, sidoqoftë në finale kryetar i PD u zgjodh Roland Bejko. Sot 9 vite më pas duket se Shemsho Lamaj e Roland Bejko janë të dy në të njëjtën llogore, si njerëz të Lulzim Bashës përkatësisht në Tiranë e Gjirokastër.
Ndërkohë mbështetësit e dikurshëm të Lamajt tashmë kanë kaluar me grupimin e “Foltores” së Sali Berishës. Në 14 maji, Shemsho Lamaj ka përballë Dorjan Lanin e “Foltores” dhe Flamur Golemin e PS-së. Gara për Gjirokastrën është thuajse formale, pasi Golemi do të rizgjidhet sërish për një mandat të dytë, ndërsa PD-ja e vulës dhe “Foltorja” do të përplasen për t’i marrë vota njëra-tjetrës. ©argjiroja.net
