Besimtarët bektashinj kanë filluar që të dielën e djeshme pelegrinazhin në Malin e Tomorrit, i cili zgjat për 5 ditë radhazi.
Gjatë këtyre 5 ditëve, besimtarët vizitojnë Teqen e Kulmakut dhe pranë varrit të Abaz Aliut kryhen ritet fetare të festës, ku çdo pelegrin falet për shëndetin dhe paqen në familjet e tyre.
Në një deklaratë për media të dhënë ditën e sotme, kryegjyshi i bektashive Haxhi Dede Edmond Brahimaj, shkurtimisht Baba Mondi tha se Kryegjyshata Botërore ka marrë masat e nevojshme për organizimin dhe mbarëvajtjen e pelegrinazhit, me të ftuar të shumtë dhe të tjera elementë të nevojshëm për ta bërë këtë rrugëtim të bukur dhe të paharrueshëm për besimtarët e pranishëm.
Po ashtu Baba Mondi i bëri thirrje të gjithë besimtarëve që të kenë kujdes gjatë kohës që ndezin qirinj, për të mos u bërë shkaktarë të zjarreve të mundshme në këtë vend, duke u nisur edhe nga situata e fundit ku ky vend u rrezikua seriozisht nga flakët që përfshinë një pjesë të malit të Tomorrit.
“Kryegjyshata ka marrë masat e duhura këto ditë. Ne gjithë këto kohë të zhvillimit të pelegrinazhit kemi siguruar rrugë automobilistike, kemi siguruar ujë dhe gjera sanitare për ti ardhur në ndihmë popullit.
Janë marrë masa për të pritur ata në restorante dhe bare, për të bërë çdo gjë që ata të ndjejnë veten si në shtëpinë e tyre.
Kryegjyshata botërore ka marrë masa për t’i mbajtur gjallë këto ditë të gëzuara të Abaz Aliut. Do ketë personalitete të ndryshme që do japin shfaqje, sic janë Kastriot Tusha, Dritan Boriçi, Bujar Asqeriu dhe të tjerë që vijnë për nder të Abaz Aliut.
Lutemi të gjithë besimtarëve që të kenë kujdes me zjarret kur të ndezin qiri. Janë marrë masa edhe për pjekjen e mishit. Pra Kryegjyshata është në ndihmë të njerëzve. Kemi marrë masa që cdo gjë të shkojë me paqe dhe dashuri”,- tha në deklaratën për media Baba Mondi.
