Gjykata e Gjirokastrës ka lënë në burg autorët e dyshuar si pengmarrës të 34- vjecarit J.Gj pak ditë më parë. Në arrest shtëpie u la nga gjykata një 14-vjecar, që është djali i Denisa Karagjozit, e arrestuar dy ditë më parë si pjesë e grupit të pengmarrësve. Denisa Karagjozi u arrestua bashkë me Myrteza Domin dhe Enea Tahon, të cilët u denoncuan nga 34 vjecari në polici. Gjykata i la të tre në ‘arrest me burg pa afat’. Ndërkohë nuk dihet roli që ka pasur në ngjarje djali i Denisa Karagjozit. Personat u arrestuan në kuadër të operacionit të koduar “Kalaja”, ndërsa iu sekuestrua 1 armë zjarri kallashnikov, municion luftarak, një sasi dozash me lëndë të dyshuar narkotike Cannabis Sattiva dhe një thikë. Policia thotë se personat kanë ushtruar edhe dhunë fizike dhe psikologjike ndaj 34-vjeçarit, të cilin e mbajtën peng.
Njoftimi i policise diten e ngjarjes:
Specialistët e Seksionit për Hetimin e Trafiqeve të Paligjshme dhe Narkotikëve në DVP Gjirokastër në bashkëpunim me Komisariatin e Policisë Gjirokastër, në bazë të informacioneve të siguruara në rrugë operative se shtetasit J. Gj., 34 vjeç, banues në Gjirokastër, i kanë hequr lirinë nën kërcënimin e armës 4 shtetas, organizuan punën dhe falë veprimeve të shpejta dhe profesionale bënë të mundur finalizimin e operacionit “Kalaja”, ku si rezultat u arrestuan në flagrancë shtetasit: M. D., 28 vjeç, E. T., 33 vjeç dhe D. K., 35 vjeçe, të tre banues në Gjirokastër, si dhe u procedua në gjendje të lirë një 14 vjeçar.
Shtetasit e mësipërm në bashkëpunim me njëri – tjetrin nën kërcënimin e armës i kanë hequr lirinë shtetasit J. Gj, duke ushtruar dhunë fizike dhe psikologjike ndaj tij për disa orë.
Falë reagimit të menjëherëshëm të Policisië dhe veprimeve të shpejta profesionale dhe hetimore u bë e mundur zbardhja e ngjarjes, identifikimi, lokalizimi dhe vënia në pranga e autorëve të dyshuar të kësaj ngjarjeje.
Nga kontrolli i ushtruar në banesën e shtetasit E. T., u gjetën dhe u sekuestruan në cilësinë e provës materiale 1 armë zjarri automatike, 35 doza me lëndë të dyshuar narkotike Cannabis Sattiva, një mjet mprehës (thikë).
Materialet i kaluan Prokurorisë Pranë Gjykatës së Shkallës së Parë Gjirokastër për veprime të mëtejshme.
