Nga Flamur Golemi
Edhe rezultati i votave të diasporës konfirmoi mbështetjen pa asnjë mëdyshje për Partinë Socialiste në qarkun Gjirokastër. Mirënjohje për bashkatdhetarët tanë në Greqi, Itali, Britani, Gjermani, Francë e kudo tjetër në Europë deri në SHBA apo Azi e Australinë e largët, që iu bashkuan këtij procesi historik dhe votëbesuan vizionin për Shqipërinë 2030 në BE.
Jo për konformitet tradite, por kam edhe një falënderim për kryeministrin Rama, falë lidershipit të të cilit sot Shqipëria është një vend krejt tjetër në sytë e të gjithë botës dhe Partia Socialiste është një fuqi transformuese, që jo thjesht fiton zgjedhjet e radhës, por sepse besimin e njerëzve e shndërron në punë, në investime dhe shërbime më të mira publike.
Qëllimi fundor i fitoreve tona nuk është vetëm të fitojmë zgjedhjet si një një ushtrim matematikor apo si një ritual që në 11 maj u përsërit për të dhjetën herë radhazi, por t’u japim udhë shpresave dhe aspiratave të njerëzve që presin dhe meritojnë më shumë nga ne. Për hir të së vërtetës presin vetëm nga ne, nga Edi Rama dhe Partia Socialiste.
Faleminderit gjithashtu kapitenes sonë Mirela Kumbaro, që nuk udhëheq me shembullin e forcës, por i bën punët me mençuri e me forcën e shembullit të gruas që dëgjon me zemër e pastaj vepron me vendosmëri duke qenë gjithnjë pranë komunitetit, afër njerëzve në Gjirokastër, Përmet, Tepelenë, Memaliaj, Këlcyrë, Libohovë e Dropull dhe duke qenë besnike së pari ndaj vlerave që ajo përfaqëson si nënë e intelektuale e pastaj ndaj vlerave të familjes sonë politike.
Gjirokastra me Mirela Kumbaron nuk është thjesht një rajon në hartë ku asaj i është besuar drejtimi nga Partia Socialiste. Ajo është e lidhur pazgjidhshmërisht me ne prej kur ishte fëmijë në rrugët e Gjirokastrës e Libohovës e deri më sot kur s’ka pëllëmbë toke të qarkut tonë që ajo nuk e ka shkelur.
Nuk dua të rrëshqas në zinxhir lëvdatash, për të cilat do të më qortonte vetë Mirela e para, por doja t’i thoja publikisht këto fjalë zemre në finale të këtij rrugëtimi elektoral kaq sfidues, që për ne në fakt është edhe starti i një përgjegjësie disafish më të madhe karshi atyre që na besuan brenda dhe jashtë vendit. Besimplotë se më e mira për Gjirokastrën dhe Shqipërinë është ende përpara
