Thellohet tragjedia në Greqi. Mes gjashtë të humburve është edhe një 29-vjeçar shqiptar. Petro Spiro Koleci, rezulton i humbur nga zona e Thives në Greqi. Ai ishte nisur për në punë që mëngjesin e së mërkurës por sot kur data shënon 17 nëntor 2017, e premte, nga Petro nuk ka asnjë shenjë jete.
Makina e të riut shqiptar, sipas dëshmive që na vijnë nga Greqia është gjetur e gjitha e copëzuar. Pranë automjetit janë gjetur edhe portofoli dhe sendet e 29 vjeçarit. Marjanthi Jani me origjinë nga Gjirokastra, e cila është kryetare e shoqatës Vatra Labe dhe që prej 25 vitesh jeton në Korintho flet për newsbomb.al dhe jep alarmin për ndihmë.
“Fatkeqësisht kemi një patriotin tonë të humbur, Petro Koleci, 29 vjeç. Makina u gjet copë-copë kurse Petrua jo. Duhet te mblidhemi të gjithë të ndihmojmë motrat dhe vëllëzerit tonë”.
Marjanthi, si është situata me shqiptarët tanë në Greqi tani që flasim?
Është shumë e vështirë. Janë përmbytur 100 shqiptarë, kanë humbur pasapotat, shtëpitë, makinat, nuk kanë as çfarë të veshin. Moti është shumë i keq, nesër dhe pasnesër po organizohemi të gjithë shoqatat dhe federata të mbedhim ndihma t’ua çojmë shqiptarëve.
Po ambasada shqiptare në Athinë, çfarë është duke bërë?
Sot kam bërë çdo përpjekje timen për të marrë reagimin e ambasadës se nuk lëviz njeri. I shkruajta edhe kryeministrit grek në telefon. Kërkova të më lidhnin menjëherë me ambasadën tonë sepse shqiptarët jetojnë me qira dhe kanë humbur dokumentacionin dhe nuk marrin dot ndihma nga shteti grek.
