Është nxehur situata mes Mladen Milinkoviçit dhe ish-klubit të tij, Luftëtarit. Avokati i trajnerit të Kukësit, Stathis Natsinas, ka kontaktuar gazetën dje dhe ka denoncuar në emër të trajnerit disa parregullsi që kanë të bëjnë me procesin gjyqësor. Sipas tij, çështja ka shkuar në FIFA dhe FSHF nuk duhet të merret më me këtë çështje. Ndërkohë, Natsinas akuzon drejtuesit e klubit gjirokastrit se nuk i kanë shlyer trajnerit tri pagat e fundit.
“Çështja e trajnerit Milinkoviç nga muaji korrik ka kaluar në FIFA. Së shpejti presim përgjigjen e FIFA-s dhe sipas kontratës së firmosur nga klienti ynë dhe klubi i Luftëtarit, FIFA është i vetmi organ që mund ta gjykojë këtë çështje. Neni 15 i kontratës së trajnerit dhe Luftëtarit e përcakton saktësisht këtë.
I bëjmë apel FSHF-së të mos merret me këtë çështje sepse e kemi informuar me kohë se nuk është në kompetencat e saj. Klubi i Luftëtarit që prej përfundimit të kampionatit nuk kontaktoi as trajnerin dhe as ne si përfaqësues ligjorë dhe mbi të gjitha nuk iu përgjigj as telefonatave dhe as e-maileve tona për të na informuar se kur do të likuidojë rrogat e trajnerit për muajt: prill, maj dhe qershor.
Gjithashtu, nuk na ka informuar për premion që duhej të merrnim për qëndrimin në Superiore si dhe për një premio që është premtuar në fund të fazës së tretë nga klubi. Nuk bëhet fjalë vetëm për trajnerin Milinkoviç, por këto rroga nuk janë marrë gjithashtu nga zv.trajnerët Marko Jovanoviç, Dhimitri Musiaris dhe Vasil Papa.
Po ashtu klubi nuk ka paguar futbollistët Bojom, Rexhinaldo, Mutumane, Bengui dhe Topi. Ju bëjmë me dije se nga java tjetër edhe çështja e zv/trajnerëve dhe këtyre futbollistëve do të kalojë në FIFA. Janë edhe gjëra të tjera që do të dalin më vonë, por edhe kaq sa thashë, nuk donim t’i publikonim, por jemi të detyruar të mbrojmë trajnerin Milinkoviç dhe stafin e tij nga keqinformimi i qëllimshëm i drejtuesve të Luftëtarit”, deklaroi Natsinas.
Ndërkaq, vetë trajneri serb deklaroi për gazetën: “Shkova si zotëri dhe u largova si zotëri te Luftëtari. I uroj suksese ekipit”./panorama sport
