Nje 30-vjeçar është arrestuar mbrëmjen e djeshme në Rinas pasi ishte shpallur në kërkim për prodhim dhe shitje të lëndëve narkotike si pjesë e grupit të Lazaratit. Ai është ndaluar nga Policia kufitare e Rinasit e cila kishte marrë informacion nga zyrat e Intepol Tirana se Brahimi po vinte me avion nga Belgjika drejt Rinasit, ku mund të prezantohej me dokumente false.
Arrestimi i tij është bërë në momentin e zbritjes nga avioni. Ndaj tij Gjykata e Krimeve të Rënda në Tiranë dhe Gjykata e Shkallës së Parë Lushnje kanë caktuar masën e sigurisë “Arrest me burg”, për veprën penale “Prodhimi dhe shitja e narkotikëve”.
Shkëmbimi i informacionit mes Intepol Tirana dhe Policisë Belge çon në pranga një 30 vjeçar të kërkuar për veprimtari kriminale në fushën e narkotikëve.
“Në orët e mbrëmjes, Policia Kufitare e Rinasit, pas informacionit të marrë nga Zyra Qëndrore Interpol Tirana, se një i kërkuar për veprimtari kriminale në fushën e narkotikëve po vinte me avion nga Belgjika për në Rinas dhe aty mund të prezantohej me dokumenta të falsifikuara, menjëherë në momentin e zbritjes nga avioni bëri arrestimin e shtetasit shqiptar B.B., 30 vjeç, lindur në Gjirokastër.
Ky shtetas ishte shpallur në kërkim në bazë të Vendimit Penal nr.269 dt.05.06.2015, të Gjykatës së Krimeve të Rënda Tiranë, e cila kishte caktuar masën e sigurisë “Arrest në burg” për veprën penale “Prodhimi dhe shitja e narkotikëve” kryer në bashkëpunim.
Gjithashtu po për këtë shtetas, Gjykata e Shkallës së Parë Lushnje, ka caktuar masën e sigurisë “Arrest me burg”, për veprën penale “Prodhimi dhe shitja e narkotikëve”, njofton policia.
