Drejtësia, Administrata dhe Arsimi janë 3 prioritetet kryesore që duhet të ketë në konsideratë qeveria gjatë 4 viteve të ardhshme, sipas qytetareve qe komentuan ne faqen e kryeminsitrit Edi Rama ne Facebook. Stafi i Ramës i ka mbledhur kërkesat në një raport që kryeministri e bëri publik po në rrjetin social.
Pasi kërkoi mendimin e komentuesve në Facebook në lidhje me prioritetet e qeverisjes, u dorëzoi atyre edhe raportin që analizonte përgjigjet, njësoj sikur të vinin nga ekspertë të mirëfilltë të sektorëve përkatës.
E ashtuquajtura Skuadra e Shënimeve ka arritur në konkluzionin se Drejtësia, Administrata dhe Arsimi janë 3 çështjet më të përmendura nga komentuesit, duke shënuar edhe një diferencë të konsiderueshme me të tjerat. Ato janë përmendur mbi 4900 herë nga komentuesit e Ramës, duke qëndruar në krye të listës së prioriteteve që përdoruesit e Facebook-ut i këshillojnë Kryeministrit t’i konsiderojë si prioritare për katër vitet në vijim.
Sipas raportit në fjalë, në vendin e katërt renditet bujqësia, ku përveç mbështetjes ndaj fermerëve si dhe infrastrukturës që lidh fshatrat me qytetet dhe tregjet, qytetarët nuk harrojnë sigurinë ushqimore. Ata kërkojnë më shumë kontroll dhe dënime më të rrepta për pesticidet dhe kimikatet e dëmshme.
Si prioritet i pestë renditet shëndetësia, ku përmenden me shqetësim mjekët e korruptuar apo mungesa e ilaçeve dhe shërbimeve.
Gjysma e dytë e 10 prioriteteve kryesore të sugjeruara nga komentuesit në Facebook, përbëhet në renditje nga punësimi, rilindja urbane, forcimi i shtetit, ekonomia dhe turizmi.
