Presidenti i FSHF-së, Armand Duka, gjatë vizitës në Laç, inspektoi nga afër punimet për ndërtimin e kompleksit të ri stërvitor të klubit Laçi, një investim i përbashkët mes FSHF-së dhe klubit. Ai theksoi se puna po ecën sipas planit dhe synimi është që në muajin qershor fëmijët të nisin stërvitjet në këtë kompleks modern.
Presidenti Duka u shpreh se ky është një zhvillim i rëndësishëm për rajonin dhe se FSHF po punon për të ndërtuar struktura të ngjashme në qytete të tjera të vendit, me qëllim përmirësimin e infrastrukturës dhe zhvillimin e futbollit në të gjitha nivelet.
“Është një investim 100% i futbollit. Një bashkëpunim i FSHF-së dhe klubit Laçi. Puna ka filluar, siç e shihni me bazamentet dhe me ndryshimin e terrenit. Jemi në fazën kur do të fillojë sistemi i drenazhimit. Objektivi bashkë me Presidentin e klubit të Laçit, z. Pashk Laska, është që në muajin qershor të fillojnë të stërviten fëmijët në këtë kompleks.
Është një kompleks që do t’i shërbejë kryesisht klubit të Laçit, por edhe të gjithë fëmijëve të zonës që do të duan të stërviten këtu dhe kombëtareve rajonale që ne kemi në rajonin e Lezhës. Besoj se ky është një zhvillim shumë pozitiv për rajonin, por ky është edhe objektivi i FSHF-së, që ne të tilla komplekse të bëjmë për çdo klub në Shqipëri.
Nëse nuk kemi një bazë të mirë infrastrukturore, është shumë i vështirë zhvillimi i futbollit. Projekte të ngjashme ne kemi filluar edhe në qytete të tjera: në Librazhd, Përrenjas, Gramsh, ky që po e inspektojmë sot dhe kemi të tjera në perspektivë për vitin e ardhshëm. Jam shumë i bindur që ky është një ndihmë shumë e madhe për zhvillimin e futbollit dhe që do të kemi më shumë fëmijë që do të luajnë në Laç.
Uroj që edhe ekipi i Laçit vitin tjetër, këtu në fushën me bar natyral, të bëjë stërvitje si ekip pjesëmarrës i Kategorisë Superiore. Fusha e parë do të ketë edhe tribunë dhe mund të zhvillohen edhe ndeshjet e të rinjve. Nuk kemi asnjë lloj dyshimi që, pasi ta përfundojmë, Laçi do ta mirëmbajë në mënyrë fantastike, ashtu siç ka mirëmbajtur stadiumin”, – tha Presidenti Duka.
Bëhet fjalë për një investim të rëndësishëm për futbollin dhe një projekt ambicioz që parashikon ndërtimin e tre fushave me përmasa standarde për një ndeshje futbolli, nga të cilat një me bar natyral dhe dy me bar artificial, një tribunë kryesore, hotel, dhoma zhveshjeje, pishinë, parking dhe mjedise të tjera që do t’i shërbejnë ekipeve të të gjitha moshave të Laçit për t’u stërvitur.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
