Presidenti Laporta optimist se Leo nuk largohet: Messi e dashuron Barcelonën

Presidenti i ri i Barcelonës, Joan Laporta, ka shpresa se Lionel Messi do të qëndrojë në Barcelonë, klubin të cilin ai është i bindur se sulmuesi argjentinas e dashuron. Laporta u rikthye në postin e presidentit të klubit pas 11 vjetëve dhe synimi i tij i menjëhershëm është për ta gjetur një mënyrë për ta mbajtur Messin në Camp Nou.
Messi, i cili ishte buzë largimit nga klubi ku e kaloi gjithë karrierën verën e kaluar kur e kërkoi zyrtarisht largimin nga Barça, ka marrëveshje me klubin vetëm deri në qershor dhe është i lirë të largohet falas në përfundim të sezonit. Duke folur si president i ri pasi i fitoi zgjedhje bindshëm të dielën në mesnatë, Laporta tha: “Sot bëhen 20 vjet që prej kur një djalosh me emrin Leo Messin debutoi për ekipin e të rinjve të Barcelonës (U12-13). Ta shohësh lojtarin më të mirë në botë duke ardhur për të votuar me djalin e vet është shembull i asaj që kemi thënë”.
“Leo e dashuron Barcelonën. Lojtari më i mirë në botë e dashuron Barcelonën”, shtoi ai. “Shpresoj se kjo do t’i ndihmojë atij të qëndrojë në Barcelonë. Këtë e do ai”. Laporta i mposhti dy kundërshtarët e tij Victor Font dhe Antoni Freixa, duke i fituar 54.28% të votave të dielën. Laporta do të jetë presidenti i 41-të në historinë e klubit të Barcelonës dhe ky do të jetë mandati i tij i dytë si president.