Zv/ministri i Brendshëm Stefan Çipa ka hedhur poshtë zërat për shkurtime të numrit të Policisë së Shtetit. Këtë deklaratë ai e bëri pas një takimi që zhvilloi në Drejtorinë e Policisë të Qarkut Gjirokastër. Sipas Çipës shkarkimet e vetme që ndodhin në Policinë e Shtetit vijnë vetëm kur ata shkelin ligjin.
‘’Kuptohet ndëshkime në radhët e Policisë ka pasur në vazhdimësi, pasi për ta bërë Policinë e Shtetit nga institucioni më pak i besuar në institucionin më të besuar, kuptohet që ka pasur edhe masa ndëshkimore. Por doja të përmendja që numri prej afërsisht 11 mijë punonjës Policie që kanë qenë, me urdhrin numër 258 datë 19.05.2017 të Ministrit të Punëve të Brendshme është implementuar në strukturën aktuale të Policisë së Shtetit. Doja të thosha që ky numër aktual i Policisë së Shtetit me miratimin e strukturës është vetëm i mbrojtur dhe nuk ka absolutisht asnjë shkurtim. Pra, numri është ky që ka qenë. Punonjësit e Policisë janë pozicionuar të gjithë tashmë në strukturat e tyre, në bazë të gradës, në bazë të punës që bëjnë në Policinë e Shtetit’’, theksoi zv.ministri i Brendshëm.
Gjatë takimit që zv/ministri Stefan Çipa pati me strukturat e policisë ka kërkuar zbatimin e Vendimit që punonjësit e Policisë së Shtetit dhe Gardës u ndalohet të përfshihen në aktivitete politike.
‘’I ndalohet kategorikisht çdo punonjësi policie që të jetë një anëtar i një force politike, të kontribuojë për një forcë politike si në pjesëmarrje, si financiarisht. Monitorimi do bëhet nga Task-Forca qendrore që është krijuar pranë Këshillit të Ministrave që drejtohet nga zv/kryeministrja’’, shtoi ndër të tjera Çipa.
