Protesta e PD më 13 maj, “përplasje” me LGBT që marshojnë në bulevard

Protesta e madhe e PD-së, mesditën e të shtunës do të paraprihet nga parada e Aleancës LGBT dhe Pro LGBT. Përfaqësuesit e LGBTI janë dakordësuar me kryedemokratin Lulzim Basha që parada e tyre të mbahet me 13 maj në Bulevardin “Dëshmorët e Kombit” pa u penguar nga protesta e opozitës. Ditën e djeshme organizatorët e Paradës Xheni Karaj dhe Kristi Pinderi zhvilluan një takim me strukturat e larta të Partisë Demokratike për t’u koordinuar. Basha ka garantuar organizatorët e paradës se nga ana e mbështetësve të opozitës nuk do të ketë asnjë incident apo kërcënim për mbarëvajtjen e sigurt të këtij aktiviteti dhe është rënë dakord që parada të zhvillohet në orën 10:00 ndërsa protesta e opozitës do të mbahet në orën 12:00.
“Parada me biçikleta e planifikuar për datën 13 Maj do të zhvillohet sipas parashikimeve pavarësisht se në të njëjtën ditë opozita ka njoftuar mbajtjen e një proteste në Bulevardin “Dëshmorët e Kombit” – thuhet ne njoftimin e LGBT.