Protesta e sotme e opozitës në Tiranë është komentuar ndër të tjera edhe numrin e pjesëmarrësve. Ndonëse Berisha e Basha folëm për 600 mijë qytetarë në shesh, në media dolën pamje me dron të marra gjatë protestës që tregonin se numri i pjesëmarësve ishte shumë më i vogël. Pjesë e këtij debati është bërë edhe kreu i PD Gjirokastër, Roland Bejko, i cili më herët në mëngjes pati thënë se nga Gjirokastra ishin nisur drejt Tiranës rreth 400 protestues. Së fundi në një reagim në faqen e tij në Facebook, Bejko pretendon se është manipuluar me pamjet. Më tej ai kërcënon duke thënë të mos luani me zjarrin sepse do t’ju përzëmë me shkelma.
Më poshtë reagimi i tij i plotë:
DURIMI E KA NJË LIMIT
Nëse një lumë i tillë njerëzish do të kishte vërshuar rrugëve të Parisit, protesta pa as më të voglin dyshim do të ishte quajtur thjesht e jashtzakonshme, madhështore, e frikshme.
Por ne jetojmë në Ballkan dhe si të tillë kundërshtarit nuk i dalim përballë, por pas shpine, duke e goditur poshtë brinje, i ngremë kurthe, i hedhim penga, shpifim, e tellim etj.
Kështu ndodhi dhe me dronin e Oligarkëve makutë, fluturoi mbi kokat e protestuesve kur ata ishin ende duke ardhur dhe akoma nuk ishin akomoduar mirë në bulevard.
Për aspektin sasior, mos gënjeni veten, por lexojeni drejt dhe me realizëm pjesëmarrjen e jashtëzakonshme të këtyre mijra e mijra qytetarëve në bulevard. Mos luani me zjarrin sepse jo kaq, por mjafton dhe gjysma e tyre për tju përzënë me shkelma që mos të gjeni vrimë ku të futeni.
Lereni mënjanë kapardisjen dhe të gënjyerit e vetes.
Ata njerëz protestojnë për gjënë më fondamentale të demokracisë: votën e lirë e të fshehtë, barazi në kushte, korektësi në votim dhe jo-tjetërsim të rezultatit.
Plotësoni këto kushte se nuk i bëni nder opozitës, por e keni detyrë kushtetuese.
Nëse nuk do ti bëni, do t’ju detyrojmë ti bëni.
Durimi e ka një limit.
