6 muaj para zgjedhjeve të 25 prillit vihet re një fenomen aspak normal për një opozitë e cila aspiron të vijë në pushtet. Të paktën kjo shihet në qarkun Gjirokastër. Ndërkohë që socialistët kanë nisur takimet në terren, me strukturat vendore të partisë dhe jo vetëm, janë gjithashtu më tepër të pranishëm edhe në rrjetet sociale, opozita duket e tërhequr. LSI-ja është pothuajse inekzistente. Herë pas herë hedh ndonjë ‘shashkë’ Vangjel Tavo në Facebook dhe bën si i habitur me çfarë po ndodh në Shqipëri, a thua se zbriti sot në këtë vend dhe s’ka qenë kurrë në pushtet. Megjithatë te LSI-ja s’ka asnjë surprizë. Tavo do të jetë po aty i pari në listën e LSI në një betejë më të vështirë se asnjëherë tjetër për të marrë mandatin e vet.
Gjendja duket më e vështirë te Partia Demokratike. Jo se janë trembur nga Covid, por për shkak të paqartësive që ka me drejtimin politik të qarkut. Nuk dihet ende kush do të kryesojë listën e qarkut Gjirokastër. Sikundër ne e kemi shprehur në një shkrim të para disa ditëve, “lufta” është mes 3 kandidatëve të votuar nga anëtarësia; Roland Bejko, Tritan Shehu dhe Entela Shehaj.
Nëse Lulzim Basha nuk cakton drejtuesit politikë të qarqeve, situata do të vazhdojë të jetë pezull dhe kjo i kushton shumë opozitës, aq më tepër kur bëhet fjalë për zona të vështira si Gjirokastra. Opozita nuk e ka luksin të mos jetë proaktive dhe as të humbasë kohë. Ky pasivitet 6 muaj para zgjedhjeve kur ke qëndruar 7 vite në opozitë është i pashpjegueshëm. Vetëm po qe se kanë ndarë mendjen të qëndrojnë sërish në opozitë ose dinë diçka më tepër se qytetarët. Fjala vjen një koalicion të përbashkët qeverisës pas zgjedhjeve PD-PS.
©argjiroja.net
