Emigrantët nuk do të votojnë as kësaj radhe nga vendi ku jetojnë edhe pse ka një vendim të Gjykatës Kushtetuese që detyron palët politike të miratojnë ndryshimet ligjore për ta mundësuar këtë të drejtë. E vetmja formë që emigrantët të marrin pjesë në zgjedhjet lokale është të vijnë në Shqipëri më 14 maj. Partia Socialiste ka nisur takimet me strukturat e saj në emigracion. Fundjavën që shkoi Mirela Kumbaro, drejtuesja e PS në qarkun Gjirokastër, mblodhi në një takim degën e PS në Greqi.
Bashkë me të ishin edhe krybashkiakët e Gjirokastrës, Tepelenës, Përmetit, Këlcyrës, Memaliajt, Dropullit dhe Libohovës. Takimi kishte në fokus organizimin elektoral të 14 majit dhe rritjen e pjesëmarrjes së emigrantëve në këto zgjedhje. Historikisht PS ka pasur një mbështetje të gjerë në radhët e Diasporës Shqiptare. Pothuajse në çdo palë zgjedhje është bërë organizimi i tyre me autobusë për të votuar në vendlindje. Pritet që po në këtë formë të ketë një organizim edhe në 14 maj. Muaj më parë dega e PS Greqi zgjodhi strukturat e reja drejtuese. ©argjiroja.net
