Kremlini ka hedhur poshtë pretendimet se presidenti Vladimir Putin do të japë dorëheqjen pasi janë shtuar spekulimet në lidhje me shëndetin e dobët të tij. Presidenti 68-vjeçar i Rusisë ka tërhequr vëmendjen e disa mediave pasi një kritik i tij, profesor Valery Solovei tha se vuante nga Parkinsoni.
Mëngjesin e së premtes, zëdhënësi i Kremlinit, Dimitri Peskov mohoi çdo pretendim për një sëmundje të Putin, duke i quajtur shpifje të pastra. Ai shtoi se lideri rus gëzon shëndet të plotë dhe nuk ka në plan të tërhiqet. Kjo megjithatë nuk është hera e parë që pretendohet se Vladimir Putin mund të vuajë nga sëmundja e Parkinsonit. Më herët, disa vëzhgues kanë sjellë pamje të lëvizjes së kufizuar të krahut të tij të djathtë krahasuar me atë të majtë.
