Egnatia është në fazën përfun dimtare të përgatitjeve për debutimin e saj në edicionin e ri të Ligës së Kampioneve, një aventurë që këtë sezon nis me përballjen ndaj ekipit islandez të Breidablik.
Kampionët e Shqipërisë do ta luajnë ndeshjen e parë të turit të parë kualifikues të Ligës së Kampioneve në “Arena Egnatia”, përpara tifozëve të tyre, të martën e 8 korrikut në orën 21:00, ku objektivi është i qartë: të marrin një rezultat pozitiv, që do t’u japë siguri për ndeshjen e kthimit në Islandë.
Skuadra ka punuar me ritëm të lartë gjatë gjithë fazës përgatitore, ku ka zhvilluar disa miqësore për të testuar formacionin dhe për të konsoliduar grupin. Tani fokusi i të gjithëve është përqendruar te sfida me Breidablik. Ky është një moment historik për klubin dhe një provë e rëndësishme për ambiciet e Egnatias që, pas dominimit në kampionatin shqiptar, kërkon të lërë gjurmë edhe në arenën ndërkombëtare. Tifozët presin me padurim një paraqitje dinjitoze dhe rezultat që të mbajë të gjallë ëndrrën e kualifikimit.
DILEMA PËR “PYKËN” – Teksa Egnatia vijon punën intensive për sfidat europiane, trajneri Edlir Tetova përballet me një nga dilemat më të mëdha në prag të ndeshjeve zyrtare: kush do ta udhëheqë sulmin? Edhe pse grupi është i plotë dhe skuadra ka shfaqur formë të mirë në miqësore, zgjedhja e lojtarit për majën e repartit ofensiv mbetet ende një çështje e hapur për stafin teknik. Deri tani, Tetova i ka dhënë besimin Saliou Guindos, duke e aktivizuar si titullar në shumicën e testeve miqësore.
Sulmuesi afrikan ka qenë i pranishëm në ndërtimin e aksioneve, është angazhuar në presing dhe ka dhënë ndihmën e tij për të mbajtur lart ritmin e skuadrës. Por, ajo që mungon dhe që për një sulmues është thelbësore, janë golat. Guindo nuk ka gjetur ende rrugën e rrjetës në këto sfida përgatitore, çka ka shtuar dyshimet për efikasitetin e tij në fazën e finalizimit. Pavarësisht se Egnatia ka arritur rezultate pozitive në miqësore dhe ka treguar një lojë të organizuar, mungesa e konkretizimit nga sulmuesi kryesor ka sjellë reflektim në stafin teknik. Në këtë situatë, në prapaskenë qëndron edhe një tjetër emër, Soumaila Bakajoko.
Sulmuesi ka pritur me durim shansin e tij, duke punuar fort në stërvitje dhe shpresuar në një hapësirë për të treguar veten. Deri tani, tekniku ka preferuar t’i besojë përvojës së Guindos, por nuk përjashtohet që Bakajoko të marrë minuta dhe të ketë mundësinë të bëjë diferencën. Me ndeshjet zyrtare që afrohen, koha për prova po mbaron. Edlir Tetova është i ndërgjegjshëm se në garat europiane çdo detaj bën diferencën, ndaj zgjidhja për repartin e avancuar duhet të vijë shpejt. Për momentin, Guindo gëzon besimin e stafit, por konkurrenca është e hapur dhe Bakajoko mbetet një “as nën mëngë” që mund të befasojë në momentin e duhur.
