Performanca e Antigoni Buxton në gjysmëfinalen e dytë të Eurovision Song Contest 2026 ka shkaktuar reagime të shumta në rrjetet sociale, pasi përfaqësuesja e Qipros arriti të sigurojë një vend në finalen e madhe me këngën “Jalla”.
Këngëtarja, e njohur për publikun edhe nga pjesëmarrja e saj në “Love Island”, performoi në skenën e Eurovisionit në Vjenë mes një konkurrence të fortë. Bashkë me Qipron, në finalen e madhe u kualifikuan edhe Shqipëria, Australia, Bullgaria, Çekia, Danimarka, Malta, Norvegjia, Rumania dhe Ukraina.
Megjithatë, menjëherë pas performancës, rrjetet sociale u mbushën me komente të shumta nga fansat e Eurovisionit, të cilët kritikuan kryesisht vokalin e artistes dhe disa probleme teknike gjatë interpretimit live. Në platformën X, shumë përdorues shprehën pakënaqësinë e tyre me kualifikimin e Qipros, duke e cilësuar performancën si një nga më të dobëtat e mbrëmjes.
Komente si “Qiproja nuk e meritonte finalen”, “Gjithçka ishte perfekte përveç vokalit” apo “Kalimi i Qipros në finale është më i keq se fitorja e Izraelit” u shpërndanë me shpejtësi online.
Nga ana tjetër, një pjesë e publikut e mbështeti Antigoni Buxton, duke vlerësuar energjinë e këngës “Jalla” dhe prezencën e saj skenike. Vetë këngëtarja kishte treguar më herët se Eurovisioni ishte një ëndërr e kahershme për të, ndërsa frymëzimin kryesor e kishte marrë nga Helena Paparizou, fituesja e Eurovision 2005 për Greqinë.
