Kreu i qeverisë shqiptare, Edi Rama, ka reaguar sërish lidhur me situatën në juglindje të vendit, e cila prej disa ditësh vijon të jetë e bllokuar për shkak të rrëshqitjes së dheut dhe fundosjes së tokës.
Ai e ironizoi situatën duke e krahasuar me Portugalinë, ku sipas tij ka ndodhur shembja e një rruge si pasojë e të njëjtave fenomene natyrore. Rama tha se, ndryshe nga Shqipëria, atje opozita “është në gjumë” dhe nuk akuzon qeverinë për korrupsion.
“Çudi e madhe, në Portugali ka ndodhur kjo nga të njëjtat fenomene, po s’po e marr vesh se mirë opozita portugeze është në gjumë, mirë edhe ato pak tenxhere mediatike të Portugalisë janë me temperaturë të ulët e s’ka vend për gjithë këtë rrugë të re, po si ka mundësi që opozitat e këtushme nuk e kanë denoncuar akoma në SPAK këtë vepër të korrupsionit dhe si është e mundur që 700 tenxheret e flakta të mexhelisit tonë mediatik nuk kanë thirrur gjithollogët e tyre që të nxjerrin faktet e tmerrshme që fshihen nën asfaltin e këtij korrupsioni qeveritar, ku padyshim është dora e narkoshtetit shqiptar!” – u shpreh Rama.
Edhe dy ditë më parë, kryeministri deklaroi se situata nuk duhet t’i faturohet qeverisë, pasi problematika vjen si pasojë e një rrëshqitjeje gjeologjike të masivit natyror në anë të rrugës së vjetër, e cila ka ndikuar edhe në aksin e ri.
