Popullimi i paprecedent i burgjeve me zyrtarë të qeverisë dhe Partisë Socialiste, e ka detyruar Edi Ramën që në fjalimin e gjatë, të mbajtur në Asamblenë e kësaj partie, të flasë jo vetëm si kryeministër por edhe si Hoxhë.
Në vitin e dhjetë të qeverisjes, me një ton melodramatik, kryeministri u kujtua t’ju bëjë thirrje socialistëve të mos vjedhin dhe të mos pasurohen “me djersën e të tjerëve” pasi kjo gjë, jo vetëm të çon në burg, ku po krijohet me shpejtësi një qeveri socialiste në hije, por është edhe “harram”, siç përkufizohet vjedhja në fenë islame.
Gjatë fjalimit, Rama shpjegoi se nuk mban asnjë përgjegjësi për korrupsionin që kryejnë zyrtarët socialistë, përfshirë edhe përgjegjësinë morale.
Ndërkohë që inceneratorët dhe sterilizimin, dy vepra të qeverisë së tij që kanë çuar drejt burgut disa zyrtarë të lartë, i quajti histori suksesi, që janë njollosur nga disa akte korruptive pa dijeninë e tij, të cilat sot po i zbardh SPAK.
“Mos bini në kurthin e pasurimit me djersën e të tjerëve! Është harram, që nuk bëhet hallall!
Pasardhësit nuk i kanë borxh t’i shohin harramit… Mos i harroni amanetet e të parëve, kujtohuni për fjalët e gjyshërve, për porositë e prindërve kur i dëgjonim nga halli dhe jeni të rregull me SPAK, gjykatën speciale, drejtësinë dhe tërlivërlin….
Kemi kaq shumë punë për të bërë dhe na duhet aq shumë angazhim, aq shumë fokus tek sfidat e vendit dhe PS.
Prandaj të përqëndrohemi dhe të bashkëveprojmë shumë më tepër. Kjo e historive të zullumqarëve është vetëm një pjesë dhe jo pjesa më e madhe e problemit.
Është edhe historia e shpejtësisë, aftësisë, historia e energjisë që duhet vënë në dispozicion, për të thelluar reformat, për të përmirësuar qeverisjen, për të zgjeruar komunitetin tonë politik përtej partisë”, deklaroi kryeministri.
