Kryeministri Edi Rama është i vendosur për t’i shkuar deri në fund aksionit për lirimin e hapësirave publike nga veriu në jug të vendit.
Për herë të parë pas paralajmërimit, këtë herë në fokus të këtij aksioni kanë qenë “varrezat e makinave”, të cilat sipas kryeministrit, ishin kthyer në një “makth” për çdo bashki të Shqipërisë.
Teksa publikon pamjet, Rama thotë se këto “varreza makinash” janë kthyer prej më shumë se 30 vitesh në qendra teneqesh e ndryshqesh.
“Më në fund, falë angazhimit të Agjencisë së Aseteve të Sekuestruara, i erdhi fundi edhe varrezave të “provave” që e nxinë jetën dhe nuk kishte zot që i shkulte nga kthetrat e burokracisë, duke grumbulluar për 30 e kusur vite në çdo bashki qendër qarku të Shqipërisë sasira të frikshme teneqerash e ndryshqesh; vatra ndotjeje të madhe që do t’ia lenë vendin gjelbërimit a projekteve të dobishme për komunitetin, ndërkohë që automjetet ende të përdorshme do t’i kalojnë institucioneve shtetërore”, shkruan Rama.
Kujtojmë se prej korrikut të këtij viti qeveria ka nisur një aksion për prishjen e të gjitha strukturave të bizneseve që zënë hapësirat publike, ky aksion është ndërmarrë në nivel kombëtar dhe ka ardhur me kërkesë të kryeministrit Edi Rama, i cili shpesh poston në rrjetet e tij sociale rastet e hapësirave publike të zëna dhe punën që po bëhet nga IKMT për të liruar këto hapësira.
