Kryeministri, Edi Rama, njëherësh kryetari i Partisë Socialiste, gjatë një takimi në Dropull me gratë dhe vajzat e kësaj zone deklaroi se biznesi i vogël do të paguajë zero tatim mbi fitim deri në vitin 2029.
Ai vlerësoi forcën e pazëvendësueshme të Partisë Socialiste në mbështetjen dhe integrimin e gruas në jetën ekonomike dhe shoqërore të vendit.
Rama tha se, “qeveria i ka dhënë një mbështetje të madhe sipërmarrjes dhe sot sipërmarrja në Dropull është shumë më e fortë seç ishte. Qoftë se ka një taksim shumë më ndryshe, ashtu sikundër janë dhjetëra mijëra biznese të reja të vogla dhe të mesme që kanë lindur vetëm vitin e fundit, për shkak se taksohen zero mbi fitimin deri në 2029. Sot ne e kemi rritur pagën minimale përtej parashikimit. Ne e kishim parashikuar të shkonte 40 mijë lekë në fund të mandatit, pra deri në 2025. Por edhe ata të tjerët, që ju e dini si i bëjnë llogaritë, se ata premtojnë çdo gjë, se nuk iu vjen rasti të mbajnë fjalën, se nuk iu vjen më fare në dorë që të qeverisin, por edhe ata e kishin parashikuar 38 mijë lekë. Ne sot e kemi 40 mijë lekë pagën minimale dhe duam patjetër ta bëjmë 45 mijë lekë, deri në fund të mandatit dhe do ta çojmë në 60 mijë lekë, pasi pa një pagë minimale 60 mijë lekë, nuk kemi bërë detyrën tonë”.
Rama shtoi se vendi ka hyrë në procesin e rritjes më të madhe të pagave.
“Paga në sektorin publik në Shqipëri, në fillim të prillit të vitit të ardhshëm, që ndonëse ka filluar që këtë prill, do të shkojë në 900 euro nga 530 që ishte në fillim të këtij procesi. Ne po takohemi përditë me sipërmarrësit duke u thënë që të rrisin pagën, sepse Evropa ka hyrë në një garë për krahun e punës dhe do të kalojë në një luftë për krahun e punës. Ne këtë luftë nuk duhet që ta humbim, por duhet që t’i mbijetojmë një gjëje të tillë. Ne po bisedojmë me kompanitë dhe po u themi se duhet që të bëjnë siç po bëjmë ne”, u shpreh kryeministri.