Kryeministri Edi Rama thotë se Shqipëria renditet shumë herë më mirë nga çfarë e paraqesin kundërshtarët politikë por edhe “ata që i duan të mirën” Shqipërisë, sa i përket dy kategorive, luftës ndaj pastrimit të parave dhe prokurimeve publike.
Në një event me ambasadorë të huaj dhe zyrtarë qeveritarë, Rama tha se sipas renditjes së Bashkimit Europian, prokurimet publike të Shqipërisë janë më transparentet dhe më efiçentet.
Ai gjithashtu tha se sipas renditjes së Indeksit të Bazelit, vendi ynë është më mirë edhe se 8 vende të BE-së, në luftën ndaj pastrimit të parave.
Rama tha se puna e komisionit antikorrupsion është themelore për përmbushjen e kushteve për anëtarësimin e Shqipërisë në BE brenda 2030-ës dhe sugjeroi se ky komision duhet të jetë i përhershëm.
“Puna e këtij komisioni është themelore. Jo vetëm që ky komision duhet të mbështetet me të gjitha fuqitë, por duhet që këtë komision ta transformojmë në një mekanizëm permanent në Kuvendin e Shqipërisë. Për ndryshe ne nuk e arrijmë dot Shqipërinë anëtare në BE në 2030. Është e pamundur për nga numri i detyrave që duhet të bëjmë, dhe BE nuk fal kur vjen puna te numri i standardeve që duhet të plotësojë një shtet. Sot Shqipëria është në vendin e parë në rajon për prokurimet publike, nga pikëpamja e eficencës, transparencës. Këtë e thotë BE, dhe për të arritur në këtë konkluzion, përdor një instrument ekspertësh që analizojnë vendet. Është i njëjti instrument që ka qenë dhe më parë dhe nuk i ka thënë më parë këto gjëra. BE e konsideron sistemin tonë të prokurimeve publike, si një sistem evropian. Kjo mund t’i duket e çuditshme atyre që e nisin ditën me “korrupsion” dhe e mbarojnë me “korrupsion”.
“Pastrimi i parave, paraja e zezë, çdo gjë këtu është para e zezë”, del indeksi i Bazelit dhe thotë që Shqipëria ka bërë në luftën kundër pastrimit të parave, një progres që në tabelën e klasifikimit janë nja 7 a 8 vende të BE-së nën Shqipërinë”, u shpreh Rama.
