Kryeministri Edi Rama zhvilloi sot një takim me shqiptarët në Kretë, ku u bëri thirrje që të kthehen dhe të investojnë në Shqipëri.
Rama tha se në Parlament ka kaluar një ligj për emigrantët, që u lehtëson investimin në tokat e gjyshërve të tyre nëpër fshatra. Duke marrë shembullin e shqiptarëve të cilët ishin emigrantë dhe janë kthyer, kryesocialisti tha se “ju dalin më mirë llogaritë”.
“Për të gjithë ata që kanë një tokë në fshat apo një shtëpi të rrënuar të gjyshit në fshat apo kanë të afërm në fshat ku mund të behet një investim, kemi kaluar në parlament ekzaktësisht për emigrantët një ligj që thotë, se çdokush që zotëron një tokë për të cilën mund të mos e ketë akoma dokumentin e pronësisë ama ka dëshmitarët e mjaftueshëm në fshat atje që është toka e të parëve, mund të marrë një vërtetim dhe mund të marrë leje për të rindezur oxhakun në shtëpinë e gjyshit dhe për ta kthyer shtëpinë e gjyshit në një agroturizëm apo për të investuar atje në çfarëdolloj rruge.
Për cilin do prej jush që do të kthehet ose të investojë, ligji thotë se për 500 aplikantët e parë, janë 10 vite pa taksë dhe pa tvsh, asnjë detyrim ndaj shtetit. Unë e di që ky ishull ka një turizëm të zhvilluar por të gjithë ata që presin sezonin këtu, i ftoj të interesohen dhe në Shqipëri, të pyesin si janë pagat. Nuk kanë nevojë të më besojnë mua, mjaftojnë të interesohen dhe të shikojnë. Ju del më mirë atje sesa këtu, megjithatë kjo është në dorën e secilit të interesohet.
Për të mbështetur investimet në fshat, BSH ka hapur dhe një linjë kredie dhe cilido që do të ketë akses, që ka interesa më pak se 3% është i ftuar ta bëjë. Pyesni ata që e kanë bërë, ka shembuj si ju që nga Greqia Anglia Italia deri dhe nga Amerika janë kthyer dhe kanë bërë këto që po them dhe të gjithë thonë këtu del më mirë llogaria“-tha Rama
