Në vizitën që zhvilloi në Athinë, kryeministri Edi Rama u takua me liderët e shtetit fqinj. Ministri i Jashtëm, Nikos Dendias tha se Greqia e sheh Shqipërinë si një mike të afërt dhe së shpejti, anëtare të Bashkimit Europian.
Greqia e sheh Shqipërinë si një mike të afërt, deklaroi ministri i jashtëm grek, Nikos Dendias, në fjalën që mbajti në ekspozitën e çelur në Athinë nga kryeministri shqiptar, Edi Rama.
“Përzgjedhja e Zapion Megaron për ekspozitën, mbart një simbolikë shumë të fortë dhe të qartë. Ky është pikërisht vendi ku në vitin 1979 u nënshkrua Traktati i Anëtarësimit. Ky është pasqyrimi si e shohim ne Shqipërinë. Një fqinje, një mike të afërt dhe më lejoni të them, shpresoj që së shpejti edhe si pjesë e familjes sonë të përbashkët”, theksoi ai.
Ndërsa në takimin me presidenten greke, Katerina Sakellaropoulou, Rama u shpreh optimist për zgjedhjen e çështjeve të lëna pezull, përfshirë çështjen e detit.
“Jam shumë optimist se pikërisht në këtë klimë do të zgjidhim më së miri të gjitha çështjet e lëna pezull mes dy vendeve. Edhe dakortësia për t’ju drejtuar një pale të tretë për zgjidhjen e çështjes së detit, tregon se jemi në rrugën e duhur për t’i dhënë zgjidhje problemeve”,u shpreh ajo.
Gjatë vizitës në Athinë, Rama u takua edhe me kreun e Kuvendit të Greqisë, Konstandinos Tasoulas.
