Kryeministri Edi Rama ka qenë i drejtpërdrejtë dhe kritik gjatë takimit me kryebashkiakët e vendit, duke mos kursyer as të parin e Bashkisë së Elbasanit, Gledian Llatja.
Duke iu referuar një ngjarjeje të ndodhur disa ditë më parë në varrezat e qytetit – ku një qytetar i vuri zjarrin barit të thatë – Rama u shpreh se situata është e patolerueshme dhe se kryebashkiaku duhej të ishte në dijeni të gjendjes së varrezave.
Ai i kërkoi dorëheqjen e menjëhershme të të gjithë drejtorëve të bashkisë, duke theksuar se një qytet si Elbasani nuk mund të krahasohet me metropole si Shanghai, ku ndoshta mund të tolerohej mungesa e informacionit nga ana e drejtuesit vendor.
“Ka potencialin të bëhet kallam dhe të bëhen varrezat si kallamisht. Është një lloj bari që është lënë pa u prekur, që jo vetëm rritet, por synon të bëhet kallam. Pastaj, kur shkon dikush dhe i vë flakën, për turp bëhen varrezat vatër zjarri. Del që personi është i çekuilibruar mendërisht, por nëse bari do të ishte qethur siç duhet, edhe zjarri nuk do merrte përmasa.”
Sipas Ramës, me 10 mandate të fituara në qarkun e Elbasanit, kryebashkiaku duhet të punojë “10 fish më shumë” dhe të ketë kontroll mbi çdo detaj të jetës së qytetit.
“Është e paimagjinueshme që në një qytet që mund ta përshkosh në këmbë çdo ditë, të mos dish çfarë ndodh. Është e pamundur që kryetari i bashkisë të mos jetë i informuar për çdo tullë që vihet. Nëse i ka sytë hapur, i rri mbi kokë çdo gjëje. Po qe gjysmë i hapur, të tjerët i kanë të mbyllur.”
Ai shtoi se edhe në Elbasan, ashtu si në disa bashki të tjera, duhet të zbatohet modeli i “shkundjes së pemës”: shkarkim i plotë, dorëheqje drejtorësh dhe provë për të gjithë se janë të denjë për detyrën.
“10 mandatet e Elbasanit, 12 të Fierit e 9 të Vlorës më kanë marrë edhe ato pak orë gjumë që kisha. Duhet të të lëmë pa gjumë edhe ty, jo të flesh më shumë. Morëm 83 mandate dhe disa sillen sikur mezi presin të tregojnë sa të fortë janë. Por nuk jemi më të fortë – jemi më të ekspozuar ndaj përgjegjësisë. Njerëzit që na dhanë këto mandate, me të drejtë, presin 10-fishin. Po çfarë 10-fish mund t’i japësh Elbasanit, nëse e le barin të bëhet kallam në varreza?” përfundoi Rama.
