Partia Demokratike zhvilloi sot protestën e radhës kombëtare në Tiranë. Ndryshe nga herët e tjera, këtë herë nuk pati fjalime, por vetëm marshim në rrugët e kryeqytetit, i shoqëruar me përplasje me policinë dhe hedhje bombash molotov.
Protesta nisi pa një plan të shpallur publikisht. Mbështetës dhe militantë të PD ndoqën nga pas kryetarin e partisë, Sali Berisha, dhe deputetët, në një itinerar që zgjati rreth 6 kilometra nëpër rrugët e Tiranës. Pika kulmore e marshimit ishte ndalesa pranë ish-vilës së diktatorit, ku protestuesit hodhën bomba molotov, ndërsa policia u përgjigj me makinën e ujit.
Gjatë lëvizjes në qytet, pati ndalesa edhe pranë Drejtorisë së Policisë së Tiranës, selisë së PS dhe zyrave të Kuvendit. Sipas zhvillimeve në terren, numri i protestuesve erdhi duke u pakësuar, ndërsa përplasjet me forcat e rendit u ashpërsuan.
Në përfundim të marshimit, protesta u shpërnda. Kryetari i PD, Sali Berisha, u largua me automjetin e tij.
Pa fjalime, pa një mesazh të artikuluar politik dhe pa një objektiv të qartë të shpallur publikisht, protesta la pas pikëpyetje mbi qëllimin e saj: ishte një thirrje për rrëzimin e qeverisë, apo një akt simbolik ndaj një simboli të së shkuarës, kur familja e diktatorit është larguar nga ajo banesë prej më shumë se 30 vitesh./VNA
